Сем ружаў

няма водгукаў

Ясмінска Надзея

19.70 руб.

Памер: 220x220 мм

Вага: 565 г

Purchase

Няма на складзе

Галіяфы Проза Літаратура для дзяцей Кнігі дзеткам Ляўрэаты літаратурных прэміяў Ясмінска Надзея

Апісаньне

Зборнік казак. / Ілюстрацыі Кацярыны Дубовік. — Мінск: Галіяфы, 2015. — 104 с.: іл. Цвёрдая вокладка.

ISBN 978-985-7021-84-0

Сем ружаў. Сем дзяўчынак. Сем чароўных гісторый, якія распавядаюць пра каханне і сяброўства, адвагу, незвычайныя прыгоды і сапраўдныя цуды. Маляўнічы зборнік завабіць юных чытачоў у свет класічнай казкі, дзе дабро перамагае, а мара ўвасабляецца ў рэальнасць.

Надзея Ясмінска, аўтарка кнігі "Сем ружаў" стала лаўрэаткай першай Прэміі Цёткі ў намінацыі "Найлепшы твор для дзяцей або падлеткаў". А Кацярына Дубовік, мастачка гэтай жа кнігі стала лаўрэаткай у намінацыі "Найлепшае мастацкае афармленне".

ЗМЕСТ

Таямніца Густога лесу, або З чаго ўсё пачалося
Пунсовая Ружа i сад вядзьмаркі
Жоўтая Ружа i лясная чарадзейка
Белая Ружа i чорны рыцар
Кармінавая Ружа i кароль эльфаў
Блакітная Ружа i скарб волаткі
Залатая Ружа i чароўны калодзеж
Чорная Ружа i вандроўны музыка

Фрагмент з кнігі Паглядзець

Таямніца Густога лесу, або З чаго ўсё пачалося

Даўным-даўно, стагоддзі таму, існавала адно запаветнае месца — Густы лес. Ён быў такім велізарным, што ахопліваў межы сямі краін. У гэтым лесе жылі чароўныя істоты, якія рэдка трапляліся на вочы чалавеку: чарадзеі, эльфы, тролі, лясныя феі, грыбныя гномы, лесавікі. Часам яны жылі мірна, часам сварыліся. А раз у сто гадоў жыхары Густога лесу збіраліся ўсе разам на таямнічае свята і рабілі падарункі не адно аднаму... а людзям. Менавіта людзям, таму што ў іх жыцці так мала чараўніцтва. Праўда, людзі часцей за ўсё не ведалі пра тыя падарункі. Яны лічылі, што ім проста пашанцавала.

І вось у адно такое свята насельнікі гушчару распалілі вогнішча да неба, селі вакол яго і спыталі старую, як сам лес, чарадзейку:

— Што мы падорым людзям гэтым разам?

Старая чарадзейка задуменна паглядзела на агонь. Толькі яна магла разгледзець у ім схаваныя знакі.

— Я бачу ружу, — нарэшце сказала яна. — І не адну, а цэлых сем. Сем цудоўных ружаў! Мы падорым іх маленькім дзяўчатам. Хтосьці з іх атрымае кветку адразу, хтосьці знойдзе яе, толькі калі вырасце. Але жыццё кожнай зменіцца ад гэтай знаходкі.

Пунсовую ружу знойдзе самая цікаўная. З-за гэтай цікаўнасці ёй давядзецца шмат чаго вынесці, але шчасце не абміне яе.

Жоўтую ружу знойдзе самая кемлівая. Нават там, дзе ніколі не свеціць сонца, яна зможа адшукаць і выратаваць дарагога чалавека.

Белую ружу знойдзе самая адданая. Дзеля сваёй сям’і яна выправіцца ў небяспечнае падарожжа. Але злыя чары адступяць перад ёй.

Кармінавую ружу знойдзе самая добрая. І дабрыня вернецца ёй стакроць. Яна здабудзе дом і сяброў там, дзе менш за ўсё чакала.

Блакітную ружу знойдзе самая сціплая. За ціхі нораў яна атрымае скарбы, пра якія толькі магла марыць.

Залатую ружу знойдзе самая моцная духам. Яна захоча вызваліць аднаго чалавека, а вызваліць цэлае каралеўства.

Чорную ружу знойдзе самая адважная. Яна не спалохаецца ворага і нават самой смерці.

Жыхары Густога лесу схілілі галовы перад старой мудрай чарадзейкай. І той жа ноччу цудоўныя кветкі пусцілі карані ў розных краінах з усіх бакоў свету. Ружы чакалі сустрэчы з тымі, для каго былі прызначаныя.

Але пра лясное свята і пра тое, адкуль узяліся сем чароўных ружаў, ведаем толькі мы з вамі. Астатнія чулі адно старыя казкі пра прыгоды дзяўчат з кветкавымі імёнамі. І калі вы яшчэ не чыталі гэтых казак, самы час пачаць.