Найвышэйшая песня Саламонава
Purchase
Апісаньне
ISBN 978-985-02-0978-8
"Найвышэйшая песня Саламонава" – адна з частак Бібліі. У ёй распавядаецца пра каханне, апяваецца трапяткое пачуццё, якое натхняе людзей, робіць іх мужнымі і высакароднымі. Тэкст у новай кнізе выдавецтва "Мастацкая літаратура" падаецца на трох мовах — беларускай, рускай, англійскай. Беларускі пераклад зрабіў вядомы пісьменнік Васіль Сёмуха. Кніга багата ілюстраваная. Народны мастак Беларусі Арлен Кашкурэвіч стварыў адметную гісторыю кахання ў малюнках, мастацка-вобразнымі сродкамі перадаў напружанасць і велічнасць душэўных перажыванняў.
ЗМЕСТ
Найвышэйшая песня Саламонава
Песнь песней Соломона
The Song Of Songs
***
Найвышэйшая песня Саламонава.
Няхай вусны яго мяне пацалуюць!
Бо лепшыя за віно твае ласкі.
Ад водару мазяў тваіх
імя тваё — як разлітае міра;
таму і дзяўчаты цябе кахаюць.
Надзь мяне! Мы пабяжым за табою; —
цар мяне ўвёў у харомы свае!
Радавацца і весяліцца будзем з табою,
больш за віно будзем славіць пяшчоты;
цябе годнасна любяць!
Ерусалімскія дочкі!
Чорная я, прыгажуня сабою,
нібы намёты Кідара
ці полагі Саламонавыя.
Не зважайце на смугласць маю;
гэта сонца мяне апаліла:
сыны маёй маці ўгневаліся на мяне, —
вінаграднікі вартаваць мне казалі, —
свайго вінаградніку я не ўпільнавала.
Ты скажы, каханне маёй душы,
дзе ты пасвіш?
дзе апоўдні ты адпачываеш?
навошта бадзяцца мне
каля статкаў сяброў тваіх?
