Межавыя знакі
Апісаньне
Вершы, навелы і мініятуры, дзённік. — Мінск: Кнігазбор, 2014. — 204. — (Бібліятэка Саюза беларускіх пісьменнікаў "Кнігарня пісьменніка"; выпуск 52).ISBN 978-985-7089-42-0
У кнігу паэта Алеся Каско ўвайшлі выбраныя вершы, напісаныя на працягу мінулых дзесяцігоддзяў, а таксама новыя творы, у якіх аўтар шчыра, прачула і па-майстэрску выяўляе свае душэўныя пачуцці і грамадскія перажыванні пра жыццё, творчасць і беларускую будучыню.
Артыкул пра Алеся Каско ў Вікіпэдыі
ЗМЕСТ Паглядзець
На Дзяды
Апоўначы стрэлкі гадзінніка зварухнуліся ўлева.
Апоўначы на мой горад апусцілася залева.
У космах дажджу пад аціхлымі вокнамі
З’явіліся постаці — бязважкія і адзінокія.
І вузкія вулачкі неверагоднае дзеялі…
Старыя домікі выпростваліся і маладзелі.
Ля сквераў — нябачныя дзённым прахожым —
З травы падымаліся раскіданыя агароджы.
І лаўкі ля іх вытыркаліся рэбрамі-спінкамі.
Камлістыя вербы станавіліся кволымі вярбінкамі.
Па-над пляцамі —
У змроку амаль непрыкметна —
Змяняліся абрысы і вобразы манументаў.
Бялелі ў залеве на вулічных пераходах
Уборы старамодныя — забытага веку і года…
А ўранку дождж сціхнуў, і ўзбуджаны горад
Абмытымі вокнамі пазіраў пыхліва і горда.
Над мокрымі дахамі, над вадасцёкамі
Сплывалі постаці — бязважныя і адзінокія.
І толькі ў кватэрах усміхалася ніякавата
Абліччы юрныя на парэпаных фотакартках.
1991
Водгукі
Неабходны Лагін або Рэгістрацыя, каб напісаць водгук.
Раім паглядзець
„У творчасці паэта ёсць адзін важны верш” - так піша Надзея Артымовіч у сваім эсэ „Паэзія – гэта вольнасць”, змешчаным у яе апошнім зборніку «Жоўтая музыка», выдадзеным нашай рэдакцыяй у 2005 годзе. Я не ведаю, які верш з'яўляецца гэтым адзіным, самым важным для яе самой. Спадзяюся, што ён увесь час пішацца. Але ж усё напісанае дагэтуль Надзеяй Артымовіч дае кожнаму з нас магчымасць адшукаць у яе паэзіі менавіта той самы, адзіны, важны верш – твой верш. Верш, які будзе ўсплываць у тваіх думках у розных неспадзяваных хвілінах і месцах. Верш – мантра, малітва, замова. Замова, мова, слова. Маўчанне – ці ж не самае таемнае і характэрнае для сакрум і прафанум ейнага жыццёва лёсу?
Кніга Анатоля Вярцінскага "Тым часам...", якая складаецца з трох раздзелаў (вершаванага, эсэістычнага і публіцыстычнага), раскрывае тэмы сучаснага жыцця ў яго шматгранных філасофскіх і сацыяльных вымярэннях.
Паэзія Ванды Марцінш душ Рэйш дужа рэдкая, анамальная з’ява. Свае вершы Ванда Марцінш праз усё жыццё пісала “ў стол”, “для сябе”, “для душы”, пісала, арыентуючыся хіба на беларускую й замежную класіку. І гэтая “ізаляцыя” толькі пайшла ёй на карысць. Калі я ўпершыню прачытаў творы паэткі, мне здалося, што я чытаю нейкую “прапушчаную” старонку беларускай класікі…
